CAA Protest: દિલ્હીના કેટલાક વિસ્તારોમાં મોબાઈલ નેટ બંધ, અનેક નેતાઓની અટકાયત

નવી દિલ્હી:  નાગરિકતા સંશોધન કાયદા (citizenship amendment act 2019) વિરુદ્ધ દિલ્હી (Delhi) માં અનેક વિસ્તારોમાં થઈ રહેલા પ્રદર્શનોના  કારણે મોબાઈલ કંપનીઓએ દિલ્હીના કેટલાક વિસ્તારોમાં ઈન્ટરનેટ (Internet)  પર પ્રતિંબંધ મૂકયો છે. અત્રે જણાવવાનું કે નાગરિકતા સંશોધન કાયદા વિરુદ્ધ અનેક સંગઠનોએ લાલ કિલ્લા અને મંડી હાઉસ પર પ્રદર્શનની જાહેરાત કરી હતી. ભારતીય એરટેલે કહ્યું છે કે કેટલાક વિસ્તારોમાં સરકારી આદેશ મુજબ ઈન્ટરનેટ, એસએમએસ, વોઈસ કોલ પર પ્રતિબંધ મૂકાયો છે. આ ઉપરાંત દિલ્હીના 17 મેટ્રો સ્ટેશન બંધ કરી દીધા છે. 

નાગરિકતા સંશોધન કાયદા (citizenship amendment act 2019) ના વિરોધમાં આજે દિલ્હીમાં લાલ કિલ્લા સ્થિત પ્રદર્શન કરી રહેલા અનેક પ્રદર્શનકારીઓને પણ અટકાયતમાં લેવાયા.  પોલીસે સ્વરાજ ઈન્ડિયાના રાષ્ટ્રીય અધ્યક્ષ યોગેન્દ્ર યાદવ, જવાહરલાલ નહેરુ વિશ્વવિદ્યાલય (જેએનયુ)ના પૂર્વ વિદ્યાર્થી નેતા ઉમર ખાલિદ, અને તેના સાથીઓની પણ અટકાયત કરી. ખાલિદ પોતાના સાથીઓ સાથે લાલ કિલ્લાથી આઈટીઓ સ્થિત શહીદ પાર્ક જવા માંગતો હતો.